Para comezar con esta materia e con este blog, o texto que debemos ler para reflexionar foi un pequeno fragmento do libro "Dysphoria Mundi" de Paul Preciado. Recoñezo que non escoitara falar do autor, mais despois dunha búsqueda na rede e a lectura do fragmento, chamou a miña especial atención a súa forma de ver o mundo e vincular conceptos que pode parecer que non teñen nada que ver.
Escoitara e lera miles de relatos sobre a pandemia do Covid-19, mais nunca vira paralelismos entre o virus e as diferentes discriminacións que sofren os colectivos máis oprimidos. Tal e como as persoas sanitarias fixeron todo o posible para erradicar unha pandemia que estaba a levarse as vidas de milleiros de persoas, certos sectores da sociedade parecen poñer un interés especial en acabar coas realidades disidentes, coma se só houbese unha maneira de vivir neste planeta. Tal e coma os gobernos decretaron un confinamento e o emprego de mascarillas para evitar os contaxios, semella que existe un medo pola exposición da sociedade ao temido virus do feminismo ou da loita polos dereitos das persoas LGBTIQ+. Un medo de ser infectade, de que os modelos de familia cisheteropatriarcais sexan tambaleados pola irrupción no mainstream de outras realidades. Mais esas realidades sempre existiron.
Considero que é especialmente importante escoitar os discursos das persoas disidentes da norma, pois é a única maneira de coñecer a loita de primeira man, por este mesmo motivo considero moi enriquecedora a lectura deste texto, e non só a nivel académico senón a nivel persoal. Se buscamos unha sociedade na que as persoas que non entren dentro da norma non sexamos tratades coma se dun virus se tratase, debemos ser oídes e só desta forma se normalizará o que xamais debeu ser criminalizado.
Comentarios
Publicar un comentario